Acts 16

Polo'e Sailasi'e'mo Timoti'mo avaleli'ana u'na'a gemae

1Polo'a ani aupilagati'mo ataleno uno Nemi taonifi'mo maigeno atale'neno Lisitiya taonifi'mo mai'niye. Mago vekamo ge'amo ne'afiya vekamo agi'amo Timoti'a ani taonifi'mo mai'niye. Ita'amo'mo agesa afino fatago hu'niya a kanomo Yu a kanomo mai'nigeno afo'amo'mo Galiki nofi vekamo mai'niye. 2Lisitiya taoni konaga vaya'e Aikoniyamu taoni konaga vaya'mogi'e'mo hu'apae'mo, kanale vekamo mai'niye, hu'a hu'nae. 3Yu vaya'mogi ani gemo afite'apae'mo Timoti afo'amo'mo Galiki vekamo mai'niye hu'a ago age'naya'mofe'mo Polo'a Timotife'mo, agufamo lagau'na atete'na avaleli'na uguve, huno hu'niye. 4Apakaemo taoni'afi taoni'afi'mo umenitata nehu'apae'mo Yulusalemu apa vaya'mogi'e yagai'a ne'apataya vayatama vaya'mogi'e'mo ke'aepa ge'apimo ani kava'mo osiyo, hu'a hu'naya ge'apimo hapa pai'apae'mo, Ani kava'mo osiyo, hu'a hapa paimale hapa paimale hu'a hapa pai'nae. 5Inagi muki siosi'ale siosi'ale'mo mai'naya vaya'mogimo mago'e mago'e hu'a apayamufa hu'a mai'nage'apae'mo muki afina'ae afina'ae'mo mago'e vaya'mo Goti mafa'nemo hamalete'a e'a magokepi lokae'a mai'nae.

Polo'mo alagamuna agegekana huno age'niya gemae

6Apakaemo Filisiya kotega'e Galesiya kotega'e'mo umenitata hu'a mai'nageno'ae'mo Goti Auneme'amo'mo Esiya kotegamo u'a Goti ge'amo ae'a hakalo hu'a hapa opaisayafe'mo ka akanino apate'niye. 7Apakaemo Misiya haopalega u'a ava'yi hute'a Pitiniya kotegamo u'a haigefe hu'naya'monanafa Goti Auneme'amo'mo ka akanino apate'niye. 8Ka akanino apate'nige'apae'mo Misiya kotegamo ae'a agase'a u'a Tolo'asi taonimo ani agi'nale'mo hane'niya taonifi'mo lami'a mai'nae. 9Mai'ne'apae'mo Polo'a alagamuna agegekana huno age'niyana mago Masetoniya kotega vekamo'a he tino Polofe'mo aukaya huno ge huno'ae'mo, kahao ke hovanagi ani'mo lakaeka Masetoniya kotegamo eka laha mao, huno ha pai'nigeno age'niye. 10Ageteno laha pai'nigetae'mo, Goti'a, Masetoniya vaya'aitegamo utapa alagepa faigoko ge'nimo aetapa hakalo hutapa hapa paiyo, huno laha pai'niye, huta lagesa afiteta Masetoniya kotegamo ugune, huta hu'none.

Mago a kanomo agi'amo Litiya'a Goti mafa'nemo hamale'niya gemae

11Lagaemo sipifi'mo haita maiteta Tolo'asi taonifi'mo ataleta ani'mo lakaetuta Samotalesi ani ago'nanenafi'mo uta ava'yi huta havaetetae'mo ataleta Niyapolisi taonifi'mo uta ava'yi hu'none. 12Ani taonifati'mo ataleta Filipai taonifi'mo uta ava'yi huta mai'none. Filipai taonimo Masetoniya kotega hogote taonimo Lomu vaya'mogimo ki male'naya taonifi'mo mago afina'mo mai'none. 13Lagaemo sapati afina'mo taonifati'mo ataleta ani agi'nalegamo nunumu'mo nehaya yategamo lami'none. Lamita ali'a anupa hu'a mai'naya a'ne anaga'aife'mo hapa pai'none. 14Mago a kanomo'a getimo alagepa huno afi'niya a kanomo agi'amo Litiya'a Taiyataila taonifi a kanomo lusi yafateti'mo miya nefaiya oko lavolavomo miya failineno maketi hu male'nige'a miya nefaiya a kanomo mai'niye. Ani a kanomo'a Gotife'mo mono nehiya a'mo mai'nigeno Ala kava ne'mo'a aipa agesamo alino halo ai'nigeno Polo ge'amo alagepa huno afi'niye. 15Lagaemo agae'e no'afi'mo mai'naya vaya'e'mo ani'mo faleta apate'nonageno'ae'mo, Nagaefe'mo, aigofe osu'nifa Ala kava nefe'mo agesa afino fatago nehiya ane, hutapa lapakesa afi'nisaya'mo'mo mani taonifi'mo mai'netapae'mo nagae nopi'mo etapa maiyo, huno laha pai'niye.

Polo'e Sailasi'e'mo kalavusi hu'a anate'naya gemae

16Lagaemo nunumu'mo hu'a ne'maiya yategamo ne'unageno'ae'mo hosu aune a'mafa'nemo kalavusi ali'ya'mo aligekana huno ali'ya'mo ne'aliya a'mafa'nemo kate'mo ne'egeta uta fotu hu'none. Agaete'mo yagai'ne'a afole aisiya kava'mo hogoteno ageteno hapa pai'nige'apae'mo alopa monimo alige alige hu'a ne'maiya a'mafa'ne'e'mo uta fotu hu'none. 17Ani a'mafa'nemo'mo Polo'e lagae'e'mo lakame huno uneno nehuno'ae'mo alopa gefati'mo huno'ae'mo, Ani vaya'mogi Goti'a hogote vekamo anaga vekamo ali'ya'amo ne'aliya vayane. Goti'a lagufamo alino katino latesiya gemo ae'a hakalo hu'a laha nepaiye, huno 18muki afina'ae afina'ae'mo ani agufa gemo huno hapa paige hapa paige huno mai'niye. Polo'a lusi kava huno alaga hae'nigeno'ae'mo aino afe leno ani hosu aune nefe'mo, Yesu Kalaisi agi'aleti'mo ani a'mafa'nemo ataleka emikeno, hu'na kaha nepauve, huno ha nepaigeno'ae'mo malage huno ataleno emine'niye. 19Ani a'mafa'nele'mo ne'yagaiya vaya'mogimo ani kava'mo agete'apae'mo, Vaehae, hu'a, lagaemo mago'e huta monimo o'alisuna kava hiye, hu'a hute'a Polo'e Sailasi'e'mo anatafau'ana he'a anavayu huli'ana hai'a taoni folagapi'mo ali'a anupa hu'a ne'maiya yate'mo gamani vaya'ai apaulagale'mo anate'na'ae. 20Anate'ne'anae'mo Lomu gamani vaya'aife'mo, Ani vekala'mo Yu vekala'mo mai'na'ana lagae taonifi'mo e'ana lusi hanageke kava'mo neha'ae. 21Ani kava'mo hiyo, hu'ana neha'a'monanafa lagaemo Lomu vaya'mogita ke'aepa getimo amagita ataleteta alu gemo lagaemo akame osisuna agufa gemo laha nepai'ae, hu'a hapa pai'nae. 22Muki vaya'mogimo ani gemo afite'apae'mo anamagisayafe'mo e'nae. Yagai'a ne'apataya vaya'mogimo Polo'e Sailasi'e'mo kukena'animo ali'a apake aite'a ali'a asagi'a atale'ne'apae'mo, kayoteti'mo anamagiyo, hu'a hapa pai'nage'apae'mo 23lusi kava hu'a anamagite'a kalavusi hu'ana anatete'anae'mo kalavusi vaya'aite'mo yagaino ne'apateya vekae'mo, kanale huka yagaika anato, hu'a ha pai'nae. 24Kalavusi vaya'aite'mo yagaino ne'apateya vekamo'a ani gemo afiteno'ae'mo kalavusi no'mo folagapi'mo ae'a anagi male'naya yapi'mo alino anateteno anaiyalate'mo yosaleti'mo aino atafauno anate'niye.

25Hani'ilaga folagu'mo Polo'e Sailasi'e'mo nunumu huge mono yokemo huge hu'na'age'apae'mo kalavusi hu'a apate'naya vaya'mogimo mai'ne'a afi'nae. 26Mai'nageno'ae'mo malage huno lusi imima'mo aliteno no'mo fai'a ate'naya yafa'mo'a lusi kava huno uti uti ai'nigeno muki kita'amo malage huno ago aino yaki'nigeno'ae'mo kalavusi hu'a apate'naya vaya'ai seli nofi'mo aino hatu mae'niye. 27Kalavusi vaya'aite'mo yagaino ne'apateya vekamo aupati'mo he tino ageyana kitamo ago aino yaki'nigeno ageteno'ae'mo, muki kalavusi vaya'amo ago ae'a akalo paetale'a apaune he'a kumategamo u'nae, huno agesa afiteno'ae'mo naipe'amo asagino agai'a agufafi'mo aeteno falisiyafe'mo hu'niye. 28Aegefe'mo nehigeno Polo'a ageteno'ae'mo alopa gefati'mo huno'ae'mo, kagaikamo aeka kika kategefe hananagi ani kava'mo osuvo. Lagaemo muki'amo afa'a mai'none, huno ha pai'niye. 29Kalavusi vaya'aite'mo yagaino ne'apateya vekamo'a, kani aeka namiyo, huno huteno alinino nagu nagu huno eno Polo'e Sailasi'e'mo mai'na'a anaiyafi'mo asagauno aino ago'ya faiteno atete huno mai'niye. 30Agaemo nopati'mo anavalelino ne'uno'ae'mo, Ala netalane, huno, Goti'a nagufamo alino katino natesiyafe'mo na kava hisuve, huno anafi ge'nige'anae'mo 31Ala kava ne'mo Yesu Kalaisifeke'mo kagesa afika fatago hugeno'ao Goti'a kagae'e afamo anagaka'e'mo lapakufamo alino katino lapategaiyanagi, hu'ana ha paili'ana u'na'ae. 32U'anae'mo agae'e no'afi'mo mai'naya vaya'efe'mo Ala kava ne'mo ava gemo hapa pai'na'ae. 33Ani afina'mo kalavusi vaya'aite'mo yagaino ne'apateya vekamo'a anamagi'naya anamute'mo aniteti'mo sese huno anate'niye. Anakaemo agae'e muki afamo anaga'a'e'mo ani'mo fale'ana apate'na'ae. 34Agaemo Polo'e Sailasi'e'mo no'afi'mo anavalelino haino ne'ya'mo alino anami'niye. Gotife'mo agae'e afamo anaga'a'e'mo apakesa afi'a fatago nehu'a apamogaga ai'nae. 35Ega netepi'mo yagai'a ne'apataya gamani vaya'mogimo ati vaya'aife'mo, Lole vekala'mo kalavusifati'mo hatu maeka anato, hutapa uta ha paiyo, hute'a ali'a apate'nage'a u'nae. 36Kalavusi vaya'aite'mo yagaino ne'apateya vekamo'a ani gemo afiteno'ae'mo Polofe'mo, Yagai'a ne'apataya vaya'mogi, hatu maeka anato, hu'a naha pai'naya'mofe'mo afa'a vi'ao, huno hana pai'niye. 37Huno hana pai'nigeno Polo'a ati vaya'aife'mo, ha'ao, Lomu gamani vaya'mogi ne'yagaiya kegi'yafi'mo mai'no'age'apae'mo yagai'a nela'atae. Lomu vaya'ai kegi'yafi'mo mai'neta'ae'mo mago hosu kava'mo osu'no'a'monanafa agoti hu'a ola'ate'ne'a muki vaya'ai apaulagale'mo afa'a la'amagi'nae. Hemenimo kesi kateti'mo hatu mae'a la'atesayafe'mo hu'nae. Ha'ao. Yagai'a ne'apataya gamani vaya'mogimo apakai'apige'mo e'a la'avaleli'a ugae, huno hapa pai'niye. 38Ati vaya'mogi u'a ani gemo yagai'a ne'apataya gamani vaya'aife'mo hapa pai'nae. Lomu gamani vaya'ai kegi'yafi'mo mai'na'ae, hu'a hapa pai'naya gemo afite'apae'mo apamo'yamo ai'niye. 39E'a kalavusi kegi'yafati'mo anavaleli'a kumatega lamite'apae'mo, Lanahao ke honanagi mani taonifati'mo ataletana alu kotega vi'ao, hu'a hana pai'nae. 40Polo'e Sailasi'e'mo kalavusi nopati'mo atale'ana Litiya notegamo u'ana mai'ne'anae'mo konaga'animogife'mo Goti ge'amo apaipamo alino lokiya vaino apatesiya gemo hapa paite'ana apatale'ana u'na'ae.